Краеведениянь кулят «Шкась. Тевтне. Ломантне»: Александр Сергеевич Щеглов

Эйзюрковонь 20-це чистэ топодевельть бу 110 иеть эрзянь сёрмадеентень, СССР-нь сёрмадеень Вейсэндявксос совицянтень, МАССР-нь заслуженной сермадеентень, Ине войнань участникентень Александр Сергеевич Щегловнень (1916–1989).

Чачсь Александр Щеглов Мордовия Республикань Дубёнкань буень Кенде велесэ сокицянь-видицянь семиясо. Школань прядомадо мейле важодсь колхозсо счетоводокс, ловнома кудонь прявтокс. Теке шкастонть кучнесь сёрмадовкст эсь буень кулялопас. Самай тосо лисстькак васенце стихензэ ды фельетононзо. Редакциясо курок редизь велень цёранть сёрмадомань ёрокчинзэ ды тердизь важодеме эстест ответственной секретарекс. Шкань ютазь, Александр Сергеевич сы Саранскоев эрзянь од ломанень «Ленинэнь киява» газетань редакторокс. Мейле сонзэ ладясызь эйкакшонь «Пионерэнь вайгель» журналонь прявтокс, косо ламо вий путсь сонзэ кастомга-кемекстамга.

Ине Отечественной войнанть ушодовомадо мейле тусь фронтов. Фашисттнэнь каршо тюремстэяк сон эзизе кадно сёрмадоманть. Бой ютксо сэтьме нурька шкатнестэ сон сёрмадсь стихть, фронтовой газетасо ёвтнесь тюремадо а пелиця эсь ялгатнеде. Войнанть А.С. Щеглов прядызе Берлинсэ. Кудов велявтсь ансяк 1947-це иестэ. Сон казезь зярыя орденсэ ды медальсэ.

Седе тов важодеманзо поладызе Мордовиянь радиокомитетсэ, «Эрзянь коммуна» газетасо. «Сятко» журналсо ниле иень перть кандсь прявт редакторонь канстонть, ульнесь «Чилисема» журналонь редколлегиясо. Валсояк, тевсэяк лездась журналонть вадрялгавтомо. Эйкакшонь туртов Щеглов сёрмадсь ёвтнемат, стихть, пьесат.

«Комсомольский билет» пьесазо ульнесь путозь театрасо 1951-це иестэ Мордовской драмань театрасо. Истя жо лиснесть книганзо: «Ёвтнемат» (1951), «Алкуксонь вечкема» (1960), «Тесэ весе мазыйть» (1963), «Иень перть» (1964), «Вишка пьесат» (1965). «Кавксть чачозь» роман-дилогиясь, Ф. Андриановонь ютавтомасо, нолдазель 1990-це иестэ кода «Егор Каргин» (1990).

Александр Сергеевич Щегловонь лемезэ эрзянь литературасонть ашти неявикс таркасо. Сон сёрмалесь литературань малав весе жанратнесэ. Сёрмадеенть произведениянзо – те тиринь раськенть эрямопингедензэ, обуцядонзо, веленть тевдензэ-мелявкстонзо, од ломантнень эрямодост, арсемадост, бажамадост ёвтнема. Сёрмадовксонзо ютавтозь зярыя СССР-нь раськень кельтнес.