Краеведениянь кулят «Пингсь. Тефне. Ломаттне»: Лука Семёнович Кавтаськин (1911–1977)

Лука Семенович Кавтаськин – МАССР-нь культурань заслуженнай работник, филологическяй наукань кандидат, СССР-нь писателень Союзонь член, литературовед, фольклорист, ученай, Великай Отечественнай войнань участник.

Шачсь Куйбышевскяй областень Подбельскяй райононь Оцю Толкай велеса. 1939-це кизоня аделазе Мордовскяй пединститутть. Серматкшнема ушедсь нинге велень школаса тонафнемста. Стихонза, поэманза, ёфксонза печатлакшневсть «Пионерэнь вайгель» журналса, газетаса.

Колмогемонце кизотнень Лука Семенович – педагог. Сон вятьсыне родной кяльть и литературать Мордовскяй рабфакса, строительнай техникумса, Темниковань учительскяй институтса.

1935-це кизоста сявовок покодсь Мордовскяй АССР-нь Министронь Советть видеса кялень, литературань, историянь и экономикань научно-исследовательскяй институтса. Тяса сон кассь кода научнай работник, арась ученайкс, филологическяй наукань кандидатокс.

Лама вий Лука Семенович путсь мокшэрзянь фольклорть кочксеманцты, якась пцтай сембе фольклорнай экспедициятнень мархта, кочкась лама мора, ёфкс, вешендсь и мушендсь народнай сказительхть, моронь содайхть.

Научно-исследовательскяй институтса работамста сермадсь и нолдась мокшэрзянь литературоведениять, критикать колга ведьгемоньда лама работа, аноклась мокшэрзянь фольклоронь аф фкя сборник. Синь ётксост сембода содафт тяфтама трудонза: «Тяниень мордовскяй сказительхнень творчествасна», «Эрзянь народнай морот», «Мокшэрзянь устнай народнай творчествать тонафнеманцты», «Мокшэрзянь содама ёфкснень кувалма заметкат» и лиятне.

Кулось 1977-це кизоня 21 июньста, калмаф Саранскяйса.