Краеведениянь кулят «Пингсь. Тефне. Ломаттне»: Валентина Ивановна Мишанина

25-це ноябрьста шачема шинц тяштькстасы МР-заслуженнай и народнай писательсь Валентина Ивановна Мишанина.

Мокшень писательницась шачсь 1950-це кизоня 25-це ноябрьста Мордовиянь Инсарскяй (тяни Кадошкинскяй) райононь Адаж велеса, сокаень-видиень семьяса.

Средняй школать аделамда меле поступась тонафнема Москуву А. М. Горькаень лемса Литературнай институту. Сяда тов работась Мордовскяй книжнай издательстваса художественнай литературань редакторкс, литсотрудникокс, прозань отделонь редакторкс, ответственнай секретарькс «Мокша» журналса.

2000-це кизоста сявомок 2004-це кизоти молемс Валентина Ивановна ульсь Мордовия Республикань писателень Союзть правлениянц председателенц полафтыец.

Сонь нинге школаса тонафнемста рассказонза, стихонза, лия произведениянза печатлакшневсть «Мокшень правда» газетаса, «Мокша» журналса. 1972-це кизоня М. Горькаень лемса Литинститутса тонафнемстонза Мордовскяй книжнай издательстваса нолдафоль «Кить ушетксоц» прозань васенце сборникоц, коза сувафтозень 13 инь цебярь азксонзон. Сяда тов фкянь-фкянь мельге лисендсть книганза «Сиянь ракакудня» («Серебрянная ракушка», 1974), «Качаму шобдава» («Дымное утро», 1976), «Ки лангса ломатть» («Люди в дороге, 1985), «Озкс тумоть тарадонза» («Ветви священного дуба», 1993), «Вальмафтома куд» («Дом без окон», 2002), «Ёронь юромста стирня» («Девочка из племени перепёлки, 2006), «Кяпе менельге» («Босиком по облакам», (2023).

В. И. Мишанинать произведениянза нолявсть мокшекс аф аньцек Саранскяйса, но и рузонь кяльса Москуса «Детская литертура» издательстваса. Сон «Озкс тумоть тарадонза», «Тройцянь карша» «Эх, ломатть, ломатть», «Кда орта лангса суви пине» и лия пьесатнень авторсна.

Пьесанзон коряс спектакльхне сидеста путневихть мокшэрзянь национальнай театрать, лия республикань сценава.

Валентина Мишанина содасазь аф аньцек Мордовияса, но и омба масторсовок. Сон участник ламоц народъётконь писателень съездтнень, конгресснон эса.

В. И. Мишанина Мордовиянь Ленинскяй комсомолонь премиянь лауреат, М. Кастренонь обществанц Почетнай литературнай премиянь лауреатоц, МР-нь заслуженнай и народнай писатель.

Тяниень пингть В. Мишанинать произведениянза ащихть вешемань ки лангса. Синь сувафневихть школань и вузонь учебникненди, хрестоматиятненди. Максыхть оцю лезкс од ломаттненди эрь кодама научнай работань сёрмадомаса. Писательсь эсь произведениянзон эса няфнесыне аф аньцек ломаттнень седиснон-ваймоснон, но и синь тяниень пингонь эряфснон. Тонафты марьсемс лиянь зиянть, сярятьфть, улемс ломаттненди, эсь масторонцты эрявиксокс.