Краеведениянь кулят «Пингсь. Тефне. Ломаттне»: Полина Владимировна Алёшина

«Мокшень масторть келес лоськофтозень эсь тюсонзон-красканзон сексесь. Мазыдонга мазы перьфпяльхне ваясть сенем потмаксфтома менельть потмос… И тяфтама мазы пингста шачф ломанць, кона пуроптсыне-кочкасыне эсь потмозонза сёксеть мазышинзон, потмаксфтома менельть тюсонзон, сидеста эрси афкуксонь поэтонь ваймокс!»

Сембе ня мяльхне-валхне лемдевихть – Полина Владимировна Алёшинати.

Полина Владимировна Алёшинась шачсь 1950 кизонь 8-це октябрьста Ковылкинскяй райононь Ежовка велеса, крестьянскяй семьяса.

Семьясна оцюволь – кассть вете стирьхть и фкя цера. Мзярда Полинанди топодсь кота кизот, сон тусь школав. Тя пингти сон маштсь ни лувома и тяштема. Сидеста сявондезе кядезонза «Мокшень правдать» и илять ваймама пингть кайгиста морафнезе велеряензонды. Сон пара мяльса лувондозень мокшень поэттнень стихснон и корязост сонцьке ушедсь латцема аф оцю стихотвореният.

Школаса Полина Алёшина тонафнесь лац. Пяк кельгозе художественннай самодеятельностть, сидеста лисендсь сцена лангс.

Ежовскяй средняй школать аделамда меле Полина Владимировна поступась Н. П. Огарёвонь лемса Мордовскяй госуниверситету. Тонафнесь филологическяй факультетса и сяка пингть аделазень спецкурснень журналистикань отделенияса.

Университетта меле П. Алёшинась прважаволь работама Петропавловск-Камчатскяи, коса служась мирдец.

1975-це кизоня П. Алёшинась семьянц мархта меки мрдась шачема-касома краезонза – Мордовияв. Аньцек тяса, афкукс сргозсь поэтть ваймоц. П. Алёшинась сермады мокшень и рузонь кяльса. Сонь васенце книгац «Тят ёта вакскан» («Не обойди меня») нолдаф мордовскяй книжнай издательстваса 1996-це кизоня. 2004-це кизоня лиссь «Азка, варма…» («Скажи-ка, ветер…») омбоце стихонь сборникоц, 2010-це кизоня лиссь «Казендеда аватненди панчфт…» («Дарите женщинам цветы…») колмоце стихонь сборникоц, «…Эсь седицень кизефтьк» («…Спроси свое сердце») стихонь сборникоц лиссь 2015 кизоня. Ламоц стихонза ётафтфт финно-угорскяй кяльс и лисендсть марстонь сборникнень эса Эстонияса, Финляндияса, Венгрияса, Карелияса, Сыктывкарса и лия вастова. Сонь стихонзон эса маряви кельгомась тядяти, природати, ломаттненди, шачема крайти, Россияти.

Полина Владимировна аф аньцек тяшти стихт, но сон и ётафнисыне рузонь писательхнень стихснон. Сон ётафтозень А. С. Пушкинонь, С. Есенинонь и лиятнень стихотворенияснон.

Поэтть творчестванц колга тяштихть лама литературоветт, критикт. Сон тонафневи высшай учебнай заведениятнень эса.

Полина Алёшина лама пинге вятсь оцю общественнай работа. Сон ульсь партийнай организациянь секретарькс, профкомонь председателькс, педсоветонь секретарькс, Ковылкинскяй общественнай организациянь местнай отделениянь председателькс. Сембе эряфонь киц сотф патриотическяй воспитаниять мархта, ётафни творческяй илятть школатнень, предприятиятнень, организациятгнень, Россиянь лия региотттнень эса. Лямбоста васьфнесазь Полина Алёшинать лувиенза, поэзиянь кельгиенза. Полина Владимировна Ковылкинскяй филиалть видеса панчсь этнографическяй музей – «Мокшень куд», коза кочкафт тежяньда лама экспонат: севонень кядьгонят, мокшень щапт, ингольдень самовархт и стак тов.

Полина Алёшинать поэзияц мала лувити, шарьхкодеви. Сяс саят мяльс, мзярда лувсайть сонь крхка и мялень кеподи стихонзон, конатнень эса маряви и няеви сембе мокшень народть ваймоц-эряфоц.

Полина Владимировнань стихонзон коряс ладяф лама мора, конатнень морсесазь Мордовиянь артисттне А. Куликовась, Л. Князьковась, Н. Спиркинась, И. Учватовась, Т. Ломакинась, Москувонь «Тяштенясь», «Эх, Мордовочка!» ансамбльхне. Полина Владимировна – талантливай педагог и поэтесса. Аф стак максфт теенза тяфтама почетнай лепт: «Заслуженный работник образования РМ», «Почетный работник начального профессионального образования РФ», казьф МР-нь Госсобраниянь Почетнай грамотаса и лия казнеса.

Минь тежятть киза эряме и карматама эряма тя модать лангса, сяс мес улихть минь тяфтама поэтоньке-аваньке, конат путнесазь эсь ваймоснон мокшень народть инкса.

10-це октябрьста П. В. Алёшина васьфтезе эсь юбилеенц. Полина Владимировна, МР-нь Национальнай библиотекань сотрудникне азыхть тейть седиста моли крхка и валда валхт! Арьсихть тейть кеме шумбраши, од и сери сатфкст поэтонь аф теждя ки лангсот.