Краеведениянь кулят «Пингсь. Тефне. Ломаттне»: Полина Егоровна Родькина (1925–2018)

Мокшень содаф сказительницась Полина Егоровна Родькинась шачсь 1925-це кизоня октябрть 7-це шистонза Торбеева аймаконь Сире Пяцёра велеса. Полина Егоровна тись аф кржа народоньконь коензон-обуцянзон ванфтомаса и касфтомаса – сонь ефксонза и азксонза мянь тянемс салсихть мяль кода шабатнень, стане и оцю ломаттнень. Эряфоньберьф покодсь, содазе кшить стака питненц. Васенце книгац лиссь 1987-це кизоня «Кшить питнец» лем ала, коза сувасть авторть ингольдень серматф аф оцю произведениянза. Тафта жа лувити лац содаф омбоце «Толгафтома атёкш» книгац.

Аф ваномок сянь лангс, што П. Е. Родькинать аф пяк лама сёрматфтонза, но сонь пяк козя мокшень кялец – произведениянза смузюфт и козят стилистикань ширде, серматфоц занци башка васта мокшэрзянь литератураса, тонафты кода оцюфнень, стане и шабатнень эряфса видеста прянь вятемати и фкя-фкянди лездомати.

Авторть мала ломанензон лятфнембяльснон коряс, мокшень авась шачсь-кассь лама идь мархта семьяса (колма браттонза и вете сазордонза), кота кизоста сявомок содась аф кржа мокшень сире морода и частушкада, маштсь сединь токазь морама. Аф стак ламонц азксонзон, ёфксонзон эса лац маряви и сказительницань ваймопожфсь и литературнай асусь.

П. Е. Родькинась тяштсь иттненди аф кржа мялень салай азкс, ламонцне эздост ульсть сувафтфт хрестоматиянь учебникненди.