Фёкла Игнатьевна Беззубова (1880–1966)

Таштамковонь 27-це чистэ топодевельть бу 145 иеть эрзянь сказительницантень Фёкла Игнатьевна Беззубованень. Чачсь сон Кочкурбуень Од Мурза велесэ сокицянь-видицянь кудораськесэ. 1918 иестэ паро эрямонь вешнемга тусь мирдензэ марто Сибирев. Тосо кувать эзть кирдеве, велявтсть мекев. Эрясть Семилей велесэ, важодсть колхозсо, мейле састь Саранскоев.

Моронь ладсеме Фёкла Игнатьевна тонадсь сырькаензэ пельде, кона лововсь велесэ паро морыцякс. Эрзянь-мокшонь литературанть туртов сонзэ ёрокчинть панжизь МК НИИ-нь фольклоронь экспедициянь учёнойтне 1936-це иестэ. Сынь сёрмадсть пельдензэ морот ды ёвтамот. Секе шкатнестэ ладсевксэнзэ кармасть лиснеме республикань газетатнесэ ды журналтнэсэ. 1939-це иестэ лиссь «Народной морот» пусмозо.

Ине Отечественной войнань иетнестэ ладсесь ёвтамот, морот-тердемат, частушкат, конат невтсть минек масторонь раськетнень героизмань ёжомарямост. Шкинемань бригадатнень марто якась фронтов, морсесь боецтнэнь икеле. Меельце пусмозо, кона лиссь эрямстонзо – «Сказт ды морот» (1958). Пингензэ перть ладсесь эрьва кодамо жанрань 80 произведеният. Сонзэ шкинемась эрзянь-мокшонь ды масторонь сказителень искусствасонть сехте редявикснэстэ.

1938-це иестэ Ф. И. Беззубова совавтозель СССР-нь Сёрмадыцянь вейсэндявксос, 1940-це иестэ тензэ максозь МАССР-нь раськень морыця лем. Казезь Трудонь Якстере Знамянь орденсэ.

Кулось 1966-це иень панжиковонь 12-це чистэ.