Иван Васильевич Чигодайкинонь шачема шистонза 105-це кизонь топодемати

Мокшень поэтть, СССР-нь писателень Союзонь членть Иван Васильевич Чигодайкинонь лемоц лац содаф мокшэрзянь литератураса и журналистикаса. Шачсь сон 1920-це кизоня 11-це сентябрьста Краснослободскяй аймаконь Сире Синдру велеса. Аделамок 1938-це кизоня Краснослободскяй педагогическяй училищать, поладозе тонафнеманц Мордовскяй педагогическяй институтонь литературань факультетса

1939-це кизоня эсь мяль вельде тусь финскяй войнав. Великай Отечественнай войнать И. Чигодайкин васьфтезе Румыниянь границаса и шумордамозонза ульсь фронтса. Васенда пехотнай полкса сержантоль, сяльде – политруконь заместитель. 1942-це кизоня аделась политшкола, покодсь «Гвардеец» и «Боевая Красноармейская» газетатнень эса корреспондентокс.

Великай Отечественнай войнаса боевой сатфксонкса Иван Васильевич казьфоль Якстерь Звездань кафта орденца – «За взятие Будапешта», «За взятие Вены» и лама лия боевой медальса.

1946-це кизоня ушедсь покодема «Мокшень правда» газетать редакцияса. 1948-1950-це кизотнень тонафнесь Горьковскяй межобластной партийнай школаса журналистикань отделенияса.

Сон сермадсь лама очерк, статья, фельетон. Васенце стихонза печатлафтольхть «Мокшень правда», «Комсомолонь вайгяль» газетатнень и «Колхозонь эряф» журналть эса.

1951-це кизоня Мордовскяй книжнай издательствась нолдазе «Шачема мастор» васенце сборниконц, коза сувасть перьфпяльть и шачем-касом ширть кельгоманц колга стихотворениянза.

Оцю событиякс поэтть творчестваса ульсь 1959-це кизось, мзярда лиссь «Кши и сал» поэмац. 1980-це кизоня лиссь «Кшить таньфоц» стихонь и поэмань сборникоц, коза сувасть инь цебярь стихотворениянза.

Иван Васильевич Чигодайкин видеста служась перанц мархта мокшэрзянь литературати и журналистикати. Кадсь цебярь стихт, поэмат, очеркт и морот. Сонь произведениянза лядсть эряфса и ломаттнень седиса.