З. Ф. Дорофеевонь «Валдая ян» и «Пиже пакся» букварензон 100 кизонь топодемаснонды

Захар Федорович Дорофеев мокшэрзятнень эзда васенце поэтсь, конань лемоц сувась мокшэрзянь письменнай литературать ушедыензон ёткс.

Сон шачсь Торбеева аймаконь Салазгорь велеса. Шумордазе Виндрейскяй кафта классонь школать, и кода пяк лац тонафни 1905-це кизоня примафоль Казанскяй учительскяй семинарияв. Тяса и ушедсь стихонь тяштема. Сяда меле работась учителькс Темниковскяй уездонь Паксянь Ордаж велеса. Ся пинкнень коряс сон ульсь грамотас содай оцю ломанькс: лац содазе рузонь классикать (Пушкинонь, Лермонтовонь, Кольцовонь…), кочксезень и ётафнезень рузонь кяльста мокшеннети, а мокшеннеста – рузоннети народнай моротнень. 

Тяштьф стихонза кочкафтольхть фкя книгас «Песни и думы народного учителя», конань эса азондовихть учителень мяльхне-арьсематне. Книгась нолдафоль Москуса 1912-це кизоня.

Сяда кизода инголе З. Ф. Дорофеев сермадозень и нолдазень «Валдая ян» и «Пиже пакся» мокшень букварьхнень, а начальнай классненди – «Од веле» лувомань книгать. 

Сонь произведениянза, конатнень эса улихть аф аньцек стихт и морот, но и азкст, нолдафт кафта книгава «Кочкаф сочиненият» лем ала. Васенце книгаса (1964) печатлафт произведениянза рузонь кяльса, омбоцеса (1965) – мокшеннеса.

Дорофеевонь ламоц стихонза и содаф произведениянза кунара ни арасть народнай морокс.