Кириллов Пётр Семёнович (1910–1955)

Медьковонь 8-це чистэ топодевельть бу 115 иеть эрзянь содавикс поэтэнтень, прозаикентень, драматургонтень Пётр Семёнович Кирилловнень. Чачсь сон Самара ёнксонь Похвистневань буень Вишка Толкан велесэ.

Прядынзе Мордовиянь педтехникумонть (1928), Московонь редакционно-издательской институтонть (1933), Кинематографиянь Весесоюзонь институтонть (1937). Важодсь тонавтыцякс, комсомолонь райкомонь сскретарекс, «Сятко» журналонь литсотрудникекс. Ульнесь войнасо. Фронтонь кинзэ ушодызе рядовой солдатокс, прядызе офицерэкс. Казезь Якстере Тештень, Отечественной войнань 1-це ды 2-це степенень ордентнэсэ.

Пётр Кириллов сёрмадсь валморот, поэмат, балладат, ёвтнемат, пьесат. Нолдась «Межавтомо» (1932), «Стака киява» (1933), «Валске Сура лангсо» (1934), «Войнань киява» (1945), «Седеень сяткт» (1948), «Кочказь произведеният» (1951), «Стихи» (1952), «Стихть ды ноэмат» (1957), «Избранное» (1958) поэзиянь пусмот, «Рот-фронт» (1933), «Эйкакшт-геройть» (1935), «Васенце урок» (1940), «Кочказь произведеният» (1958) ёвтнемань ды повестень книгат. Драмтеатрань ды клубонь сцена лангсо невтевсть «Литова» (1940), «Валдо васоло угол велькссэ» (1950), «Учительница» (1953) сонзэ пьесанзо. 1986–1988-це иетнестэ Мордкизсэ лиссть колмо томсо кочказь произведениянзо. 2024-це иестэ Мордовиянь книгань издательствась нолдызе «Литова» драманзо ды «Пьесат» пусмозо.

Кулось 1955 иень еундерьковонь 24 чистэ. Калмазь Саранскойсэ.