Краеведениянь кулят «Шкась. Тевтне. Ломантне»

Аштемковонь 23-це чистэ топодевельть бу 90 иеть Россиянь Сёрмадыцянь вейсэндявксос совицянтень, Россиянь культурань заслуженной важодицянтень, Мордовиянь народной поэтэнтень, МР-нь Государственной премиянь лауреатонтень Иван Алексеевич Калинкиннэнь.

Чачсь сон Ульяновск ёнксонь Инзань райононь Чейвелесэ. Bишка пингестэ кадовсь тетявтомо (чавовсь Ине Отечественной войнасо). Эйкакшпоразо ютась Мордовиясо – Покш Игнатбуесэ. Орданьбуень культпросветучилищань ды Горькиень высшей партийной школанть прядомадо мейле важодсь «Восход» райгазетань редакторокс (1970–1972), «Эрзянь правда» газетань отделэнь прявтокс (1972–1975), «Сятко» журналонь прявт редакторокс (1977–1984).

1984–2000-це иетнестэ ульнесь Мордовиянь Сёрмадыцянь вейсэндявксонь правлениянь председателекс. 1985-це иестэ кочказель МАССР-нь Верховной Советэнь депутатокс. Казезь «Знак Почёта» орденсэ.

И. А. Калинкин эрзянь поэзияс совась ютазь пингень ведьгеменце иетнестэ. Васенце книгазо – «Зорянь мизолкст» – лиссь 1969-це иестэ. Поэтэсь алтызе сонзэ тиринь ёнксонтень, тесэ эриця ды важодиця ломантненень. Седе мейле нолдазельть «Маней пиземе» (1972), «Сырнень сюлмо» (1974), «Лёмзёркс чире» (1977), «Витькстамо» (1981), «Пиче вирь» (1985), «Кизэнь менель» (1992) пусмотне, «Ава ды лей» (1995) стихсэ романось, «Васоло ки лангсо» (2000) повестесь. 2005-це иестэ Мордкизсэ лиссть И. Калинкинэнь колмо томсо кочказь произведениянзо. Васенце томонтень совасть валморот, «Кискань эрямо» повестесь ды «Уцяска» очеркесь; омбоце томсонть – поэмат ды «Ледстнемань васолкст» сонетэнь каштазось; колмоцесь ашти «Ава ды лей» стихсэ романстонть.

Иван Алексеевич Калинкинэнь шкинеманзо содасызь ды вечксызь аволь ансяк эсенек республикасо, сонзэ томбалеяк. Рузонь кельс ютавтозь стихензэ лиснесть «Литературная газета», «Литературная Россия» газетатнесэ ды «Наш современник», «Дружба народов», «Нева», «Волга», «Огонёк» журналтнэсэ. Рузонь кельсэ нолдазельть «Отцовский характер» (1979), «Зелёные костры» (1983), «Надежда» (1995), «Женщина и река» (1998) книгатне. Теде башка, Московсо лиссть «Черёмуховый берег» (1983), «Песни с берегов Суры и Мокши» (1988), «Колесо» (1990) пусмотне.

Кулось И. А. Калинкин 2012-це иень аштемковонь 14-це чистэ. Калмазь Саранскойсэ.