Фёдор Семёнович Атянин (1910–1975)

Мокшень писательсь, МАССР-нь культурань заслуженнай работниксь, СССР-нь писателень Союзонь членць Фёдор Семёнович Атянин шачсь июнь ковть 19-це шистонза 1910-це кизоня Пенза ошень Мокшан аймаконь Мокшень Муромка велеса. Ульсь батракокс, сапожниконь ученикокс, грузчикокс. Ётазень войнать стака кинзон-янонзон, коста мрдась 1944-це кизоня и кармась покодема мокшень кялень и литературань преподавателькс Москуса, театральнай искусствань институтса.

Меле сась Саранскяи, кармась сёрмадома.

«Мазы пинге» стихонь васенце сборникоц лиссь 1954-це кизоня. Сяльде мокшень и рузонь кяльса лиссть книганза: «Сельведь-богатырь», «Тунда», «Чудо над Мокшей», «Ласточка», «Серебряное озеро», «Поступок Нади», «Гимназист» и лият.

1967-це кизоня мокшэрзянь музыкально-драматическяй театраса няфтьфоль Ф. Атянинонь «Атямсь кельги мокшень стирь» пьесанц-ёфксонц коряс спектакль, кона пяк тусь ваныхнень мяльс. Тя спектакльсь ётафтф рузонь кяльти и няфневи театраса тянемс.

«Серебряное озеро» – тяфта лемдезе писательсь инь содаф книганц. Сон аф весть нолдафоль миньцонк и Москуса.

Ф. Атянин кельгозе мокшэрзянь фольклорть и оцю мяльса кочксезе сонь. Кульф ёфкснень, легендатнень, азкснень нолязень писателень седиенц пачк и книганзон вельде пачфнезень лувити.

Творческяй кинц ушедозе кода поэт. Васенце стихонзон печатлазень 1939-це кизоня. Фёдор Атянин козякофтозе мокшэрзянь литературать лама ширде. Сон сёрмадсь и стихт, и морот, и поэмат, и азкст, и повестть, и ёфкст, и пьесат.

Кода драматург Фёдор Семёнович кармась содавома «Атямсь кельги мокшень стирь» легенда-драманц Мокшэрзянь музыкально-драматическяй театрать сценанц лангса путомдонза меле (1967). Тя жанраса содаф нинге Атянинонь ёфксоц-пьсац «Аргуня» и Советскяй Союзонь Геройти М. П. Девятаевонди лемтьф драмац «Самая длинная из дорог» («Инь кувака кись китнень ёткста»).

Няевикс васта Федор Атянинонь творчестваса занци стихса повестец. Васенце книгась «Шадось ушедсь» лиссь 1958-це кизоня, омбоцесь – «Варьхмодема ланга» 1962-це кизоня. Но сембодонга лама сон сермадсь иттненди. Писательть книганза сембе пингова мусазь эсь лувиснон.

Кулось Ф. С. Атянин июльть 10-це шистонза 1975-це кизоня.