Григорий Карпович Ульянов

Таштамковонь 25-це чистэ топодевельть бу 160 иеть эрзянь-мокшонь ине просветителентень, общественно-политической деятелентень, журналистэнтень ды педагогонтень Григорий Карпович Ульяновнень. Чачсь сон Саратовань губерниянь Кузнецкой уездэнь Кулясова велесэ (ней Пензань областень Камешкирэнь район), сокицянь-видицянь семиясо.

Земствань школанть прядомадо мейле Гриша Ульянов тусь тонавтнеме Вольскоев тонавтыцянь семинарияв. 1885-це иестэ макссть тензэ школасо тонавтыцянь лем. Важодеме кучизь Саратовань губерниянь Кузнецкой уездэнь эрзянь Наскафтым велев (ней Пензань областень Шемышеень район). Просвещениянь покш мельде-арсемадо пештязь, од педагогось куроксто малавгадсь велень эрицятнень марто, ветясь седейшкавань кортамот, конат лиснесть васов школань программатнень томбалев ды властень кирдийтнень ёндо эзть шнаво. Тень кувалма 1889-це иестэ Григорий Карповичнень школанть савсь кадомс.

Уцяскань вешнеме Ульянов тусь Саратовав. Васня важодсь губерниянь земской управань статистикань отделсэ, мейле ладязель секе управань народонь образованиянь отделэнь прявтокс. Тесэ теевсь содавиксэкс лия ине эрзянь – писателенть ды общественной деятеленть Степан Васильевич Аникин марто. Вейсэ сынь тейсть Саратовань губерниянь народонь училищань тонавтницятненень ды тонавтыцятненень лезксэнь максома общества, ламо вийть путсть те обществань Весероссиянь съездэнь анокстамонтень ды ютавтомантень (1902).

Инязоронть каршо тевензэ кисэ Г. К. Ульянов панезель Чивалгома ёнксонь Сибирев. Тов апак пачкоде, 1906-це иень тунда Тюменень тюрьмасо сонзэ сасызе покш куля: Саратовань «Трудицянь союзонть» пельде кочказель Государственной васенце Думань депутатокс. Тень кувалма сонзэ нолдакшнызь оляс.

Депутатокс важодемадонть башка, Г. К. Ульянов топавтсь ламо тевть. Сон ульнесь социалисттнэнь-революционертнэнь «Дело народа» газетань редакторокс, 1906-це иестэ саезь 1910-це иес – те партиянть членэкс.

1908-це иестэ Г. К. Ульянов тусь Финляндияв, тосто пачкодсь Францияв ды Швейцарияв ды малав кемень иес явовсь Россиянть марто. Тенень тулкадизе реакциясь, кона ушодовсь Россиясо 1905–1907-це иетнень революциянть лепштямодонзо мейле.

1916-це иень тунда Швейцариянь Кинталь велесэ ютась весе Модамасторонь социалистэнь-интернационалистэнь конференция, кона кемекстась войнань сялдыця ды зярыя лия пек эрявикс документт. Делегаттнэнь ютксо ульнесь Г. К. Ульяновгак, кона кочказель тов эсерэнь партиянь интернационалистэнь пельксэнть пельде.

1917-це иень майстэ эмиграциядо мейле васенцеде сон чалгась тиринь моданть лангс. Важодеме кармась Саратовань губерниянь земствасо.

1918-це иень июньстэ саезь Г. К. Ульяновонь эрямосо ушодови од шка. Сонзэ сайсызь важодеме просвещениянь коряс Народной комиссариатов, ладясызь Наркомпросонь официальной органонь – эрьва таргосто лисниця «Народное просвещение» газетань – ответственной секретарекс. А. В. Луначарский, Н. К. Крупская, М. Н. Покровский, масторонь общественно-политической лия содавикс деятельтнень ды педагогтнень марто вейсэ важодемась макссь тензэ пек ламо, лездась теемс эсь касомасонть икелев од эскелькс.

1919-це иестэ «Народное просвещение» редакциясь кучизе Г. К. Ульяновонь Саратовань ды Пензань губерниятнева ютамо. Мейле те килангонть сон сёрмадсы «Письма с дороги» очеркень пусмосонзо, конасонть келейстэ невтьсы эрзятнень марто мокшотнень революциядо мейлень эрямост, культураст ды просвещенияст.

Кода видестэ тешкстыть Г. К. Ульяновонь эрямонь ды творчествань кинзэ тонавтницятне, сон невтизе прянзо эрзятнень ды мокшотнень тонавтомаст пек ёроков ладицякс. Ламо вийть путсь национальной интеллигенциянть вейсэндямонтень, национальной школанть тееманзо туртов. Тенень пек лездасть эрьва кодат съездтнэ, конференциятне, со вещаниятне, конатнень сон анокстась ды ютавтсь.

Покш мельсэ вастызе Г. К. Ульянов эрзятнень марто мокшотненень национальной государственностень максомадо кулянть. Васня те ульнесь Мордовской округ (1928), мейле Мордовской автономной область (1930) ды Мордовской Автономной Советской Социалистической Республика (1934). 1930–1931-це иетнестэ МАО-нь исполкомонть тердеманзо ды школасо важодема лувтнень тонавтнема институтонть заданиянзо коряс сакшнось Мордовияв народонь образованиянть ды культуранть ванкшномо-тонавтнеме: кода ванстови тиринь келесь рузонь ды эрзянь-мокшонь билингвизманть пингстэ. Г. К. Ульянов ютась Отяжбуень, Ицялонь, Кочкуровань ды Саранскоень уездтнэнь эрзянь ды мокшонь велетнева, вастневсь тетятнень-аватнень марто, кортась икелест тонавтома тевсэнть чачома келенть эрявиксчидензэ.

Ды весе эрямозояк Г. К. Ульяновонь кеместэ сюлмазель журналистиканть марто. Сех ламо мель явсь педагогикань публицистикантень, сёрмадсь ды печатась малав 60 статьят. Сынь лиснесть «Народное просвещение», «Коммунистическое просвещение», «Просвещение национальностей», «Народный учитель», «Крестьянский журнал» журналтнэсэ, «Якстере теште», «Учительская газета» ды зярыя лия газетатнесэ. 1923-це иестэ Елена Карповна сазоронзо ды Елисей Васильевич Скобелев марто нолдась советской шкань эрзянь васенце букварь – «Тундонь чи».

Ине Отечественной войнанть ушодовомадо мейле Григорий Карпович Ульянов понгсь эвакуацияс. Эрясь Московской областень Климовск ошсо, косо 1943-це иень якшамковонь 23-це чистэ кулоськак.

Эрямонь а шожда ки ютась эрзянь раськенть превей цёразо. Чопода, сёрмас а содыця велесэ чачозь-касозь, эрьва кодамо майсемань ды стакачинь печтязь, сон эзь синдеве, свал мольсь икелев, эсь киванзо, ды те лездась тензэ арамс Россиянь сех ине ломантнень ваксс. Ды кадык народонь просвещениядо кой-кона мелензэ-арсеманзо течи, паряк, аламодо таштомсть, сынь ялатеке эзизь ёмавто историографиянь ды этнокультурань питнейчист.