Нина Степановна Живайкинать 100 кизонцты
Н. С. Живайкинась мокшэрзянь крайса содаф писатель. Нльне стака лувомска, мзяра сон казсь эсь народонцты сединень токай азкста, стихта, статьяда. И кажнайти путнезе эсь седиень псинц, Шкайть мархта максф талантонц. Синь эздост няеви оцю кельгомась мокшэрзянь крайти, ломанти, оцю мяльса лездомс кажнайти. Тяка пингть сон мезьдовок аф пелезь сялнезень и визделгофнезень сятнень, кит юмафнезь совестьснон, кальдявста вятезь пряснон кудса, покодема васта. Лиякс мярьгомс мокшавать эряфонц мазопнезе творчествась.
Надежда Степановна шачсь 1924 кизоня Краснослободскяй райононь Колапа мокшень велеса. Кемзисемге кизоса стирнякс кармась работама школаса начальнай классонь учителькс. Великай Отечественнай вйнать аделамде меле шумордазе учительскяй институтть, а сяльде – Мордовскяй госуниверситетть. Сисем кизот семьясна эрясть Узбекистанца. Мрдамок Саранскяй, покодсь Мордовскяй книжнай издательстваса редакторкс и сяка пингть ульсь рузонь кялень преподавателькс Мордовскяй госуниверситетонь подготовительнай курснень эса. Меле – рузонь кялень и литературань учителькс средняй школаса. Творческяй кинц ушедозе стихонь сермадомаса, конат печатлакшневсть «Мокшень правда» газетаса, «Мокша» журналса, а тафта жа «Од вайгяльхть « марстонь сборникса. Васенце книгац «Атязень уроконза», кона лемтьф шабатненди лиссь 1992-це кизоня. Сяда тов фкя-фкянь мельге лисендсть книганза «Стака киза», «Казне», «Золотой панжемась».
