![](https://natlibraryrm.ru/wp-content/uploads/2024/08/kraevedeniyan-kulyat-pings.-tefne.-lomattne_.-_-zakrytaya-gruppa-informacziya-na-sajt-nb_3-450x250.jpg)
Писательсь Василий Максимович Коломасов шачсь 1909-це кизоня 14-це августста Большеберезниковскяй аймаконь Найман эрзянь велеса, тозк и шумордазе школать. Саранскяйса партийнай школать аделамда меле покодсь «Эрзянь коммуна» газетаса и «Сятко» журналса. Великай Отечественнай войнада инголе ульсь колхозонь председателькс.
Литературав кинц Василий Максимович ушедозе поэзияста. Васенце стихоц – «Иля аварде» («Не плачь») печатлафоль «Сятко» журналса 1931-це кизоня, а ниле кизода меле лиссь «Прока атя» азксоц.
Журналистонь и председателень тефне тиезь сяда оржакс Василий Максимовичень ванфонц эряфть, перьфпяльть и ломаттнень лангс, сяс сон коль сяда сидеста кярьмотькшнесь художественнай произведениянь сермадома. Тяштсь аф аньцек азкст, но и пьеса «Прокопыч», кона путфоль театраса.
1938-це кизоня прьмафоль СССР-нь Писателень союзу.
1940-це кизоня башка книгакс лиссь «Лавгинов» романоц.
Войнань кизотнень писательсь ётафтозень фронтса, 1943-це кизоня ульсь стакаста ранендаф. Войнада меле аф ламос покодсь Саранскяйса, сяльде тусь шачема велезонза школав тонафтыкс, вятсь кялень да литературань урокт. Кемоньшка кизода меле мрдась меки Саранск ошу и кармась работама журналса.
Писательть лемоц сядонга кайгозевсь «Лавгинов» романть лисемда меле. Сяда тов сон ульсь ётафтф эрзянь и рузонь кяльхненди и пяк кельговсь лувихненди, сяс 1961-це кизоня Москувонь телевидениясь няфтсь корязонза пьеса.
Василий Максимович Коломасов казьфоль «За боевые заслуги» медальса и Трудовой Якстерь Знамянь орденца, тейнза максфоль Мордовскяй АССР-нь заслуженнай писателень лем.