Панжиковонь 28-це чистэ топодевельть бу 70 иеть эрзянь содавикс поэтэнтень, журналистэнтень, кельстэ кельс ютавтыцянтень Николай Иванович Ишуткиннэнь. Сон чачсь 1954-це иень Мордовия АССР-нь Покш Березникбуень Симкина велесэ, служащеень кудораськесэ. 1971-це иестэ Покш Березникбуень Чугырвелень школанть прядомадо мейле тонавтнесь Н. П. Огарёв лемсэ Мордовиянь госуниверситетэнь филологиинь факультетсэ. Университеттэ мейле кевейкее иеть важодсь «Эрзянь правда» кулялопасо корреспондентэкс, старшей корреспондентэкс, отделэнь прявтокс.
1989–1990-це иетнестэ заочна тонавтнесь Московонь социально-политической институтонь журналистикань отделениясо. 1995-це иестэ совась Россиянь Сёрмадыцянь вейсэндявксос, конань вийсэ ютавтовиця од сёрмадыцятнень туртов семинартнэсэ 25 иеде кувать ульнесь эрзянь секциянь прявтокс, лездась касомс од поэттнэнень ды прозаиктненень.
1987-це иестэ саезь П. И. Ишуткин важодсь «Чилисема» журналонь прявт редакторокс. Журналось а весть тешкстазель кода Россиясо эйкакштнень ды од ломантнень туртов нолдавиця сехте вадря издания.
Н. И. Ишуткинэнь лиссть эрзянь ды рузонь кельсэ сёрмадовксонзо марто валморонь ды прозань кеменде ламо пусмонзо, ютксост – «Валскень теште» (1989), «Тештень мастор» (1994), «Вармань кандовкст» (2004), «Пейделькань кужине» (2007), «Сёксень кизэнь паламо» (2009), «Сиянь сурсеме» (2011) ды лият.
Николай Иванович тешкстазель «Отличник печати СССР» знаксо (1990). Теде башка, сон МР-нь культурань заслуженной важодиця (1999), МР-нь заслуженной поэт (2015), МР-нь государственной премиянь лауреат (2012).
Тусь поэтэсь эрямосто 2021 иестэ якшамковонь 12-це чистэ.
