Константин Дмитриевич Савостин – Советскяй Союзонь Герой, Великай Отечественнай войнань участник. Сон шачсь12-це августста 1918-це кизоня Мордовия Республикань Краснослободскяй аймаконь Селищат велеса, сокаень-видиень семьяса. Покодсь Баку ошень нефтань промысласа, тоста сявозь армияв. 1939-це кизоста сявомок ульсь суваф РККА-ти. 1942-це кизоня аделазе Тамбовскяй кавалеристскяй училищать.
1-це Белорусскяй фронтонь 2-це гвардейскяй кавалерийскяй корпусонь 35-це гвардейскяй кавалеристскяй полконь сабельнай взводонь комиссарсь гвардиянь лейтенантсь Савостин эсь подразделениянц мархта аф весть сувсесть врагть тылс брянскяй вирьхнень эса. 1944-це кизоня Березина ляйть маласа К. Савостин эсь гвардеецензон мархта флангста атаковандазе противникть, машфтсь немецонь 2 самоходнай орудият и тянь мархта перязе кить врагть атаканзонды.
Варшавать маласа К. Д. Савостин ранендафоль. Госпитальса пчамда меле 1944-це кизоня сон меки мрдась фронту. 24-це январьста 1945-це кизоня Бромберг ошть маласа (тяни Быдгощ, Польшась) ляйть туркс ётамста полафтозе эскадрононь ранендаф командирть.
2-це февральста 1945-це кизоня Савостинонь эскадроноцты, коса ульсь 20 гвардеец, мярькфоль занямс шоссейнай кить Фледерборн велеть маласа (Оконек ошть эзда лямбе шири, Польшась). Гитлеровецне лейтенанть группанц тапама ёрдасть целай эсесовскяй дивизия, конань ульсть танканза и самоходнай пушканза. Вийхне ульсть аф фкя лацоннет. Но боецне виень апак ужяльть стясть фашистнень каршес. Тя кить инкса тюремста Савостин эсь гвардеецонзон мархта машфтсть 320 немецонь солдат и офицер, 4 пушкат, 8 миномётт, 120 «Фауст» ружья, 20 автомашина и транспортёр.
Солдаттне тюрсть мекольдень патронцнон аделамс и прасть геройкс Родинаньконь инкса. Тя бойса Константин Дмитриевич Савостин шавовсь.
24-це мартста 1945-це кизоня К. Д. Савостиноди куломдонза меле максф Советскяй Союзонь Героень лем. Казьф Ленинонь, Якстерь Знамянь орденца. Кудса, коса сон эрясь, повфтаф лятфнемань седяф. Геройть лемоц максф Селищань средняй школати. Краснослободск ошса Константин Дмитриевич Савостинонди путф бюст.
