70 киза – Николай Петрович Циликинонди

Коса шачендыхть поэттне?.. Кда кивок максы тяфтама кизефкс, ламотне отвечайхть: «Поэттне шачендыхть велеса». Афкукс, велесот синь шачема-касома унксна, велеса, перьфпяльдень мазышись, сембось, мезть максозе ломанти Шкайсь: паксятне и лугатне, вирьхне и ляйхне, сембось, мезсь аф аньцек кеняртьфнесамазь, а ули кода азомс – трясамазь и щасамазь. Велесь, шять мзярдовок аф юмай, кда сонь эсонза шачихть-касыхть тевонь кельги од ломатть. И сидеста кайги велеть лемоц, кда сонь шачи эсь поэтоц. Тяфта мяльса кирьдезь астама вал Краснослободскяй райононь Зайця велеса эряй поэтть Николай Циликинонь колга. 1978-це кизоня Николай Циликин аделазе Мокшэрзянь университетть и сась шачема велезонза. Тянемс тоса эряй. Велеряенза лац сонь содасазь и мярьгондихть теенза Николай Петрович. И тя афкукс тяфта. Сон ульсь тястонь школаса завучекс, директоркс, тонафнезень Зайцянь иттнень. Тонафнесезень, штоба содалезь и кельголезь тядянь-алянь кяльть и литературать, а тяфта жа рузонь кяльть и литературать. А нинге лездсь касомс пара вайме ломанькс, мумс эряфса эсь киснон.

Н. П. Циликин стихонза васенцеда ушедсь лисендема районнай газетаса, «Мокша» и «Якстерь тяштеня» журналхнень лопаняснон лангса. А сяда тов синь лисендсть башка книгакс. Васенце книгац «Седись таколфты седить» лиссь 1996-це кизоня. Сяда меле лиссть книганза «Ару ваймон эрьхке», «Эняльдезь виденцяма», «Ялгаксшинь меквайгяль», «Ваймон серьгятькс» и лият.

А. С. Пушкинонь лемса Национальнай библиотекань сотрудникне поздравляндасазь поэтть юбилейцень мархта. Арьсихть кеме шумбраши, оцю сатфкст творчествасонза, пара мяльхть-арьсемат.